Kuhlwe emini kuboshwa iphoyisa ngelokweba R1 million
UCaptain Ntombekhaya August oboshelwe icala lokweba uR1 million emahhovisi ezobunhloli e-East London ngoJanuwari nonyaka.
Image: South African Crime and Justice Information/X
LIHLEHLILE icala lokweba imali engaphezu kuka-R1 million elithweswe uCaptain Ntombekhaya August oneminyaka engu-49.
Umsolwa, uboshwe ithimba loKlebe ngaphansi kophiko lwe-Serious Organised Crime Investigation, ngokubambisana nezinye izinhlaka zomthetho, ezinsukwini ezinhlanu nje kwenzeke isigameko sangoJanuwari 10.
Okhulumela oKlebe uLieutenant-Colonel Avele Fumba uthe kwangena indoda engaziwa emahhovisi ophiko lwezobunhloli yenza sengathi ivakashele u-August. Isingaphakathi, kubikwa ukuthi yakhipha isibhamu yakhomba owesifazane imnikeza isikhwama iethi akafake imali phakathi. Kuthiwa lo mlisa waphuma nemali engaphezu kwesigidi samaRandi.
Uphenyo olunzulu lwakhomba u-August njengomsolwa, waboshwa wathweswa icala lokweba.
Uvele ngoLwesibili enkantolo yeMantshi e-East London icala lakhe lahlehliselwa umhla ka-2 Ephreli ukuze kwenziwe izethulo zokuthi lidluliselwe enkantolo yesifunda. Njengamanje ungaphandle ngebheyili kaR4000.