Abarhanelwa abathandathu babanjiwe kwityala lokubulala KwaMaqoma.
Image: File
Kubanjwe kwavalelwa abarhanelwa abathandathu kuhola wendlela uN2, kufutshane neKinkelbos, kulandela isehlo sokudutyulwa nokuxhomisa izolo, kwaMaqoma, eBhofolo.
Ngokwengxelo ekhutshwe nguWarrant Officer Majola Nkohli, abarhanelwa aba babanjwe kungagqithanda neeyure ezimbini emva kwesi sehlo. Abarhanelwa bona baphakathi kweminyaka engama27 ukuya ku29. Ingxelo kaWarrant Officer Nkohli iqhuba ithi, ngaphakathi kwemoto leyo yabarhanelwa kufunyenwe umpu ongenamaphepha, iimbumbulu, kunye nemfonomfono ebiweyo.
Ukanti umpu lo ufunyenweyo uza kusiwa kuvavanyo lwemipu neembumbulu, iballistic ngelasemzini. Bonke abarhanelwa baseluvalelweni ngezityholo zokubulala, ukuba nompu ongenamaphepha, kwakunye neembumbulu.
Abarhanelwa aba baphinde boyanyaniswa kwisiganeko sokudutyulwa kwendoda ngethuba ihleli kwigumbi lokuphekela kwindlu ekwisitalato iMbewu, KwaMaqoma, emva kwentsimbi yesihlanu ngoMvulo wale veki, umhla we10 kweyoKwindla.
Ingxelo ithi, abarhanelwa abane, nalapho omnye umrhanelwa ebephethe umpu, bambonzeleke kule ndlu, ze badubula ixhoba elo. Ixhoba, negama lalo linguBulelani Dayile (40), waziswe njengobhubhileyo kwindawo leyo yexhwayelo. Ukanti abarhanelwa bathe bakwazi ukuba imfonomfono, phambi kokuba baphele emehlweni.
Ingxelo iqhuba ithi, uphando olwenziwe kwindawo yexhwayelo ifumanise ukuba abarhanelwa abane basebenzise imoto yohlobo lweSuzuki Ertiga ukubaleka kule ndawo. Iinkcukacha zithe zathunyelwa kuwo onke amapolisa, nalapho malunga nentsimbi yesixhenxe ngokuhlwa, imoto elolu hlobo ithe yabonwa kuN2, kufutshane naseKinkelbos, ze yamiswa ngamapolisa.
Aba barhanelwa bathandathu, kulindeleke bavele enkundleni yamatyala KwaMaqoma, ngoLwesine, umhla we13 kweyoKwindla, ngamatyala aquka elokuqhekeza, ukuba nempahla ebiweyo, umpu ongenamaphepha kunye neembumbulu.
OyiNkumanda yeDOCC eSarah Baartman, uColonel Andries Landman uncome amalungu ngokusabela ngokukhawuleza. "Isicwangciso esichubekileyo kunye nentsebenziswano ekhawulezileyo ibiyeyona nto iphambili ekubanjweni kwaba barhanelwa. Abecuphi bethu baxakekile kungokunje ngeenkcukacha zabarhanelwa abathandathu" uvale ngelo uColonel Landman.
Related Topics: